Nausica
“Reina, isculta sa pregadoria!”
(Càntigu VI – Ott. 22-28)

-Reina, isculta sa pregadoria!
Dea ses tue o femìna umana?
Si ch’istas in s’Olimpu ses Diana
tant’ermosura as tue e galania!
S’invece abbertu in terra nostrana
as sos ojos, milli e prus d’una ia
dicciosu babbu tou umpare a chie
dae pettus su latte at dadu a tie!

Biados puru sos frades chi gosu
lean miréndeti in cara a donz’ora
e chi cando a sas festas t’’ighen fora
proan cunfortu in cara lumenosu.
Ma prus de tottu fortunadu ancora
s’ómine chi ti leas pro isposu
e chi cun donos pretziosos tantu
a domo si che portat tant’ispantu!

Femìna de siendas raras gai
ne in mundu e ne in bisione
bidu, ti giuro, non nd’ap’’eo mai,
e rispettu nde proo e devossione!
Tue m’ammentas un’apparissione
a Delo, cando partidu oramai
fia pro Ilione, ue frimmei
pro Apollo immortale e l’onorei.

Accurtzu a s’altare bi notei
una palma e, a pes d’issa, noellu
unu rebuddu altu e gai bellu

ch’abbauccadu a longu nde restei!
Goi mi lassas tue, o pinnadellu!
Pro vinti dies in mare gherrei
prim’’e ficchire pes in custa terra,
biu ma cun su coro in cuntierra!

Dae Ogìgia fintz’a custa foghe
solu peleas m’an dadu e malannos
sos Immortales e, de tzertu, inoghe
àteros mi nd’approntan de ingannos!
Iscùltala, o reina, custa ‘oghe
chi piagheres ti dimandat mannos!
Ma prima ‘e donzi cosa dia cherrer
de mi dare un’istratzu a mi coberrer!

Posca sa ‘idda m’ammustra bonigna
e de s’Olimpu s’immortale Mere
ti ricumpenset cust’òpera digna
maridu e fizos déndeti a piaghere.
Mai in domo tua cosa maligna
b’intret, ma sempre isposu e muzere
biver bi pottan in bon armonia,
cun amore, abbundàntzia e allegria.-

«Furisteri, mancari in mala ura
-li nat sa printzipessa cun amore-
s’’idet chi ses de zente de valore!
Coro ‘onu b’at sutta sa bruttura!
Dae Zeus nos benit sa tristura,
su gosu, s’arrennegu e su favore.
Cantu m’at dimandadu t’ap’a dare,
ca bramo in tottu de t’accuntentare