A mama

(Intregu)

E t''ido...dae sempre pilicana,

ma frisca 'e pizu che rosa d'abrile

sétzida a manu in barra in su giannile

poi caladu sole, a gana a gana

sa Mama ringrassiende soberana

pro su pane, sa paghe 'e su foghile

a movitia 'e laras, che bisende,

istragos e dolores olvidende.

T''ido...e che Andròmaca troiana

ti dia cherrer tando immortalare

cun versos de ammiru, pro ti dare

che a issa mentovu in sa mattana

chi tue puru as dévidu affrontare

da' s'ìsula Ichnusa a sa Grecana,

a sa terra de Scilla...ma sa mia

no est che sa d'Omero lughe 'ia!

Ma si t'est su matessi aggradessidu

su fruttu 'e su suore de degh'annos,

acco' chi ti l'apporro, presumidu,

déndeti a chizu infustu basos mannos!

Galu una 'olta mi so attrividu

a bestire a Omero in sardos pannos,

tucchende a Ilione a manu tenta

infatt'a Isse...si nde ses cuntenta!

ANTONINU RUBATTU-PIGA